પૂર્વ કચ્છના ભચાઉ તાલુકા ધોરાવીર ગામમાં સરકારી જમીનને લઈને ગંભીર આક્ષેપો સામે આવ્યા છે. ગ્રામજનોના જણાવ્યા મુજબ, ગામની અંદાજિત 1036 હેક્ટર ‘શ્રી સરકાર’ જમીનમાંથી આશરે 130 એકર જેટલી કિંમતી સરકારી જમીન ખાનગી હિત માટે હસ્તગત કરવાનો પ્રયાસ થયો હોવાની આશંકા વ્યક્ત કરવામાં આવી છે. આ મામલે ગ્રામજનો દ્વારા જિલ્લા કલેક્ટર સહિત સંબંધિત તંત્ર સમક્ષ લેખિત રજૂઆત કરી સમગ્ર પ્રકરણની નિષ્પક્ષ અને પારદર્શક તપાસની માંગ કરવામાં આવી છે.ગ્રામજનોના આક્ષેપ મુજબ, કેટલાક પ્રભાવશાળી તત્વો દ્વારા સરકારી જમીન ઉપર કબજો જમાવવાની તથા જમીન સંબંધિત દસ્તાવેજી પ્રક્રિયામાં ગેરરીતિ કરવામાં આવી હોવાની શંકા છે. જો કે, આ તમામ આક્ષેપોની સત્તાવાર તપાસ અને દસ્તાવેજોની ચકાસણી બાદ જ હકીકત સ્પષ્ટ થઈ શકે તેમ છે.ખારોડા જમીન પ્રકરણ વચ્ચે હવે ધોરાવીરા વિસ્તારમાં જમીન સંબંધિત કથિત ગેરરીતિઓને લઈને પણ સવાલો ઉઠી રહ્યા છે. જમીનના રેકોર્ડ, માલિકી હક્ક, દસ્તાવેજી પ્રક્રિયા, પરવાનગીઓ અને જમીનના ઉપયોગને લગતી બાબતોની તટસ્થ તપાસ કરવાની માંગ સ્થાનિક સ્તરે ઉઠી રહી છે.આ સમગ્ર ચર્ચા વચ્ચે ભાજપના નેતા એન.આર. ગઢવી તથા સડવાણી ના નામને લઈને પણ આક્ષેપો અને ચર્ચાઓ ચાલી રહી હોવાનું સ્થાનિક સ્તરે જણાવાઈ રહ્યું છે. જોકે, સંબંધિત વ્યક્તિઓ સામેના આક્ષેપો સત્તાવાર રીતે સાબિત થયેલા હોવાનું માનવું યોગ્ય નથી અને તેની હકીકત તપાસ તથા સત્તાવાર દસ્તાવેજોના આધારે જ સ્પષ્ટ થઈ શકે છે.
નવા IAS અધિકારી સામે મોટો પડકાર? પૂર્વ કચ્છમાં નવા નિયુક્ત થયેલા IAS અધિકારી અભિષેક પ્રમોદ તળે સમક્ષ હવે ખારોડા તથા ધોરાવીરા જેવા જમીન સંબંધિત પ્રકરણોમાં તંત્રની કામગીરી પર સ્થાનિકોની નજર છે.
ગ્રામજનોની માંગ છે કે સમગ્ર મામલામાં જૂના અને નવા જમીન રેકોર્ડ, સરકારી જમીનની હદ, સર્વે નંબર, દસ્તાવેજો, પરવાનગીઓ, હસ્તાંતરણની પ્રક્રિયા તથા સંબંધિત અરજીઓની ઝીણવટપૂર્વક તપાસ કરવામાં આવે. ખાસ કરીને સરકારી જમીન ખાનગી હિત માટે વપરાઈ છે કે નહીં, કોઈ પ્રકારનો ગેરકાયદેસર કબજો થયો છે કે નહીં અને દસ્તાવેજી પ્રક્રિયામાં કોઈ ગેરરીતિ થઈ છે કે નહીં—તે અંગે તટસ્થ તપાસ થાય તેવી માંગ છે.
‘શ્રી સરકાર’ની જમીનના રક્ષણનો સવાલ : ગ્રામજનોનું કહેવું છે કે સરકારી જમીન એ જાહેર મિલકત છે અને તેની જાળવણી તથા રક્ષા કરવાની જવાબદારી તંત્રની છે. જો સરકારી જમીનના રેકોર્ડમાં કોઈ ગેરરીતિ થઈ હોય અથવા જમીન પર ગેરકાયદેસર કબજો કરવાનો પ્રયાસ થયો હોય તો તેની તાત્કાલિક તપાસ થવી જરૂરી છે.
ખારોડા પ્રકરણ બાદ ધોરાવીરા જમીન મામલે પણ તપાસના આદેશ થશે કે કેમ? દસ્તાવેજોની સઘન ચકાસણી થશે કે કેમ? અને તપાસમાં ગેરરીતિ બહાર આવે તો જવાબદારો સામે કાયદેસરની કાર્યવાહી થશે કે કેમ?—હાલ આ સવાલો સ્થાનિકોમાં ચર્ચાનો વિષય બન્યા છે. હવે સમગ્ર મામલામાં તંત્ર દ્વારા શું કાર્યવાહી કરવામાં આવે છે તેના પર સૌની નજર છે.
